Gards og Ættesoga

INDRE TUEN

Publisert

Frå OS SOGA III side 87 – 98


38. INDRE TUEN.

Um namnet, uttale og skrivemåtar, sjå ytre Tuen, som er grannegarden på vestsida.  Indre Tuen ligg likeins som grannegarden i sørhallet av Lifjellet.  
Garden hadde dei same eigarar som ytre Tuen. 

Or gamle matriklar og teljingar: 
1668: Saar 5 smale tønder, afler 18 tdr., trang feemarch, lidet brendeved, tilsagt at plante homblehagge.  Befindes i deris udmarch goed jord som kand bebygges og indheignes til gaardens beste.  
1723: Ingen sætter, ei heller saa meget skoug som til brendefang fornøden er til gaarden, ingen qvern eller fiskerie.  Middelmaadig jordart, temmelig letvinden, men haver ingen hauge eller udmarck.  Haver ingen brug eller handling uden allene gaardens aufling, ingen lejlighed til handel.  
1865: Har 12 mål dyrket ager og eng, hvoraf 3 maal godt, 5 middels og 4 slet, har 56 maal naturlig england, deraf 5 maal godt, 28 middels og 23 slet, intet af englandet kan dyrkes.  Har skog kun til brænde, sælger haslebaand for 1 spd. aarlig.  Føder 1 ungnød ved skav og lyng, gaarden er middels letbrugt og almindelig drevet, men lider af tørke. 

Busetnad og buskap.  

Hus-Menne-Hes-Stor-Sma-Gjei-Svin.UtsådUtsåd
lydar.skje.tar.fe.ler.ter.korn.poteter.
16572  1066   
16683  15   5tun 
17233  24   6,5» 
1800217       
183532211210 18»4tun.
186532111446 28»10tun.
190041321221 36,5hl.16,5hl.
192051931115 33mål5mål
193041421125 12,5»2,5»
1939  178  1»1,2»

INDRE TUEN 1. 

Torgudt pa Twe (Torgaut Tuen) hadde bruket her i 1519 og er fyrste mann som me finn nemnd på garden. 

Lars Tuen var brukar i 1563 og hadde garden radt til 1603.  I 1563 var det ogso ein «løs karl», Arne Tuen, som lagde skatt.  Um han var dreng på garden eller busett her på annan måte, veit me ikkje.  

Johannes Tuen vart brukar etter Lars, som truleg var far eller verfar hans.  Då Johannes fekk bruket vart det skift i tvo partar, s. br. 2, men etter det me kann skyna var den utskilde parten liten samanlikna med det attverande bruket.  Johannes sat tolleg godt i det, og bruket hans må ha vore eit godt bruk med di futen tok det sjølv seinare, s. n.  Av huslyden hans kjenner me ein son Lars, f. ikr. 1606, s. n.  Johannes hadde bruket til 1624. 

Morits Busk (Boested) fekk bruket i 1624.  Han hadde sidan 1615 vore fut i Lysekloster og sidan 1610 fut over Munkelivgodset.  På dei tider då han tok bruket på Tuen slutta han som fut i Lysekloster, og dreiv då ogso garden Hauge i Os som han hadde havt sidan 1617.  Morits Busk var son åt ein rådmann i Odense, Danmark.  Det danske namnet var Boested, men i Norig vart han jamnast kalla Busk.  Han var fyrst skrivar hjå ymse stormenn, vart so fut i Lofoten og Vesterålen, og var ei tid fut i Sunnhordland og seinare i Sogn.  I 1610 vart han som nemnd fut over Munkelivgodset og nokre år seinare ogso for Lysekloster.  Han var ein søkkrik mann som åtte gardar i mange bygder på Vestlandet og skrapa til seg pengar og jord alt det han kunde.  Morits Busk var ein av dei mest illgjetne futar som hev vore i Norig, s. O. B. I 130 – 31 og 478.  G. 1610 Margreta Stranges dtr., dotter åt den kjende Lyseklosterfuten Strange Jørgensen som bygde gamleløda i Lysekloster, s. O. B. I. 476 – 77.  Av borni vart ei dotter Cecilia, f. ikr. 1611, gift med Lyseklosterfuten Albert Berner, s. Nordstrønen 1, og ei onnor dotter Karen, f. 1618, vart gift med borgarmeistar Ove Jenssøn i Bergen, s. Nordstrønen 1.  Morits hadde bruket her til 1629.  I 1633 vart han avsett som fut.  Han døydde i 1640 og Margreta i 1658. 

Johannes indre Tuen vart brukar i 1629, og er tvillaust same mannen som hadde bruket fyrr futen tok det i 1624.  Det vart no lagt so mykje jord til bruk 2 at begge bruki vart jamstore.  Johannes var no gamall og vart vanleg kalla «gamle Johannes» til skilnad frå mannen på grannebruket, s. br. 2.  Johannes sat ikkje so lett i det no som då han hadde bruket fyrste bolken.  Han var brukar til 1636. 

Lars Johannesson indre Tuen, f. ikr. 1606, bygsla bruket etter faren i 1637.  Kona hans heitte Marta, og det er alt det me veit um henne.  Av borni kjenner me berre ein son, Ola, f. ikr. 1640, som var ugift i 1687.  Lars døydde i 1684. 

Ola Nilsson, f. ikr. 1650, bygsla bruket i 1675.  Kvar Ola var frå er noko uvisst, men fleire ting tyder på at han var son åt lensmann Nils indre Lekven frå fyrste giftarmålet hans.  G. 1675 Kari Daniels dtr. Søfteland, f. ikr. 1640.  Kari døydde truleg ikr. 1690, for eit par år etter finn me at Ola er gift med ei som heitte Margreta.  Born: Ola, f. ikr. 1680, s. n., Halvard, f. 1684, tente på Tysnes i 1704, Nils, f. 1688, tente på Skåtun i 1701.  3 born døydde unge.  I kyrkjeboki stend at Ola døydde i 1698, men andre stader finn me at han livde og brukte garden i mange år etter den tid.  Kvifor presten skreiv at han var død so tidleg, veit me ikkje. 

Ola Olson indre Tuen, f. ikr. 1680, vart brukar etter faren ikr. 1715.  Han var gift med ei som heitte Brita, f. ikr. 1675.  Ho døydde i 1724, og Ola gifte seg att straks etter med ei som me ikkje veit namnet på.  Ola fekk 5 døtre i siste giftarmålet, men tvo av dei døydde unge.  Dei som vaks upp var: Kari, f. 1725, Kristi, f. 1732, d. ug. 1765, Brita, f. 1736.  Ola sat sverande tungt i det og greidde ikkje sitja med bruket.  I 1745 flutte han frå Tuen med huslyden og reiste or Osbygdi. 

Torkjell Monsson Jarland frå Samnanger, f. 1720, bygsla bruket i 1746.  G. 1746 Unna Peders dtr. Frøland frå Samnanger, f. 1727.  Born: Peder, f. 1749, Brita, f. 1750, d. ug. 1832, Mons, f. 1752, Synneva, f. 1755, Ola, f. 1758.  Torkjell sat like smått i det som fyremannen og streva hardt for å greida seg.  Han døydde alt i 1759, og då kona gifte seg att måtte borni fara tidleg or heimen.  Berre dotteri Brita vart verande att i Osbygdi.  Då ho var 74 år gamall måtte ho for retten avdi ho kom med ymse skuldingar mot skulemeistaren Torstein Spansteig.  Ho slapp lett frå saki avdi ho var so gamall. 
Då Torkjell kom til Tuen var desse husi på bruket: Ei røykstova med tvo svaler attåt, eit stabur, ei løda og eit fjos med attåtbygd sval.  Fleire av husi trong vøling, og til dette vart gjort tok jordeigaren pant i ein koparkjel som var verd 6 dalar (tvo kuverd). – Indre Tuen var einaste garden i Os der alle brukarane på dei tider hadde kvar sine hus på tunet og ikkje brukte nokon av husi ihop. 

Nils Andersson Øvredal, f. 1731, gifte seg i 1760 med ekkja Unna Anders dtr. og vart brukar her.  Då Torkjell døydde i januar 1759 skunda Nils seg og fridde til ekkja, og ho slog til.  Fyrr 2 månader var gjenge hadde Nils fenge alt greidt med ekkja, hadde tinga bygsel på bruket frå sumarmål 1759, og skulde gifta seg med ekkja i jonsokhelgi.  Men han fekk anna å vita.  Fyrr Nils gjorde det visst med ekkja um våren 1759, hadde han hyrt seg som dreng til kapellan Astrup på Fusa, og då Nils ikkje kom i tenesta sumarmåldag tok Astrup han for retten.  Nils orsaka seg med at han hadde bygsla Tuen og ikkje kunde gå i tenesta, men då han ikkje hadde fenge bygslesetelen fyrr sumarmål, so fann ikkje retten orsakingi god nok.  Nils fekk ein strid dom for misferdi si.  Fyrst skulde han betala attende dei 28 skjeling som han hadde fenge i hyrepengar, og deretter 1 dalar for «skade» og 4 dalar for «tab» til kapellan Astrup.  I sakskostnad måtte han leggja 2 ½ dalar.  Då ei drengjeløn dei tider var 4 – 5 dalar, (kapellan Astrup sa rett nok at han løna drengjene med 6 dalar året), so vart dette tvo heile årsløner for Nils.  Attåt dette vart han dømd til å stå i gapestokken ved Oskyrkja.  Domen um dette lyder so:  
«Den indstefnte bør til fortjent straf og andre løsmundede til afskye ifølge den elligerede forordning næste prædikensøndag ved Ous hovedkirke efter at denne dom lovligen er forkyndt afsohne den begangne forseelse med det at hand 2 timer før og 2 timer efter prædikenen staaer i kirkens halsjern.» 
Alt dette Førde til at Nils fekk ikkje gifta seg i 1759.  Året etter fekk han greid bygsla på bruket og vart gift med ekkja um sumaren.  Born: Torkjell, f. 1767, g. 1797 Kari indre Moberg, s. Sørstraumen 1, Nils, f. 1770, g. 1801 Brita Johannes dtr., s. Lunde 5.  Tvo born døydde unge.  Nils greidde seg so nokolunde, men han vart ikkje gamall på Tuen.  Han døydde alt i 1770. 
Ekkja Unna Peders dtr. hadde bruket eit par år, men greidde so ikkje sitja med det lenger.  Det vart då skift millom dei tvo andre mennene på indre Tuen, og det kom dermed burt som sjølvstendugt bruk. 


INDRE TUEN 2. 

Olluff inndre Thuffwuenn (Ola Tuen) vart fyrste mann på dette bruket då det vart skilt ut frå bruk 1 i 1603.  Bruket var då lite, og Ola som elles sat smått i det lagde berre ein liten husmannskatt.  I 1611 måtte han saman med 30 andre osingar nedover til Svinesund for å møta svenskane i Kalmarufreden.  Ola kom ikkje att til Tuen og truleg døydde han ved svenskegrensa. 
Bruket vart no stjorna av grannen på garden i 12 år, s. br. 1. 

Ola indre Tuen vart brukar i 1623.  Han var gift og fekk ei dotter Sesilia i 1624, s. n.  Ola døydde alt same året. 

Johannes indre Tuen bygsla bruket i 1625, og vart då truleg gift med ekkja etter Ola.  Kona heitte Kristi.  Dei hadde mange born, men me kjenner berre 3 av dei: Arne f. ikr. 1632, g. 1668 Marta indre Lekven, s. i. L. 1, Mari, f. ikr. 1635, Sesilia, f. ikr. 1638, g. 1691 Ola ytre Moberg, s. y. M. 4.  Kannhenda hadde Johannes ogso ein son Ola, s. indre Lekven 1 og Lunde 2.  Johannes sat likeins som fyremannen smått i det.  Han hadde bruket til han døydde ikr. 1660. 
Kvar dei ovannemnde brukarane var frå, veit me ikkje. 
Ekkja etter Johannes, Kristi indre Tuen, hadde bruket nokre år etter at mannen fall frå.  Ho døydde i 1675, ikr. 80 år gamall. 

Mikkjel Mikkjelson, f. ikr. 1636, bygsla bruket i 1664.  Etter det me kann skyna var han son åt Mikkjel ytre Moberg som døydde i 1636, og som då fekk yngste sonen uppattkalla etter seg.  Mikkjel vart gift i 1664 med ei som heitte Brita og som tvillaust var dotter åt Johannes og Kristi.  Av borni kjenner me tvo søner, Ola, f. 1666, og Lars, f. 1673.  Mikkjel sat tungt i det, og i 1675 måtte han flytja frå bruket.  Me finn korkje han eller nokon av huslyden hans i Osbygdi seinare.  

Vinsjans Nilsson indre Moberg, f. ikr. 1644, bygsla bruket i 1675.  G. 1674 Sesilia Ols dtr. indre Tuen, f. 1624, som no fekk farsbruket sitt.  Ho var kannhenda halvsyster åt kona som flutte frå bruket, s. o.  Vinsjans hadde bruket til han døydde i 1698.  Sesilia livde til 1716, då ho fall frå over 90 år gamall. 

lsak Nilsson Sundøy, f. ikr. 1673, vart brukar då Vinsjans døydde.  G. 1703 Anna Jens dtr. Hauge, f. ikr. 1670.  Dei fekk tvo døtre, men berre den eine, Marta, f. 1705, vaks upp.  Isak døydde alt i 1706, og ekkja flutte frå bruket med dotteri.  

Lars Nilsson Sundøy, f. 1675, bygsla bruket då broren døydde.  G. 1707 Brita Jørgens dtr. Berlandstveit frå Hålandsdalen, f. ikr. 1641.  Då ho døydde i 1737 var ho uppgjevi til å vera 96 år gamall og skulde etter det vera 34 år eldre enn mannen.  Men um dette er rett, veit me ikkje.  Lars hadde ikkje born.  Han sat sverande smått i det, men greidde å sitja med bruket til han døydde i 1738. 

Lars Pederson, f. ikr. 1715, og kona Sigrid Torkjells dtr., f. ikr. 1697, flutte hertil og bygsla bruket i 1738.  Kvar Lars og Sigrid kom frå og var frå, veit me ikkje.  Sigrid døydde alt i 1742 og Lars gifte seg att same året med Gjerttrud Anders dtr. Skjeie, f. 1713.  Born: Kari, d. e., f. 1739, g. Sjur Krokeid i Fana, Malena, f. 1740, g. 1774 Ola Olson Tysnes, b. Bergen, Anders, f. 1743, s. n., Kari d. y., f. 1751, g. 1798 Peder Åsen, s. Salbuvik 2, Anna, f. 1753, d. ug. 1835, Magdela, f. 1757, g. 1800 Nils Øvreide, s. Lunden 2.  3 born døydde unge.  Lars sat sverande tungt i det og streva hardt for å greida seg.  Han vart sume år skriven som husmann, enndå han hadde halve Tuen.  Då presten Geelmuyden var død tok arvingane hans Lars for retten avdi han ikkje hadde svara arbeidspengar til presten på 11 år.  Elles var Lars ein vyrd mann, og då den fyrste vegbru i Osbygdi vart bygt ved Søfteland i 1786 var han med som skynsmann.  Han var då over 70 år gamall.  Lars døydde i 1790 og Gjertrud i 1778. 
Då Lars var brukar hadde bruket hans desse husi: Ei røykstova, ei sengebud med eit tak som vilde ramla ned, eit eldhus, løda og fjos. Uthusi var kleine likeins som budi, og Lars måtte leggja åbod til husi vart vølte.  Til pant for åbodi tok jordherren desse tingi hjå Lars: Eit åklæde verd 1 dalar, ein sylvring, ei sylgja og ei sylvsnor verd 2 dalar ihop, ein liten koparkjel verd 2 dalar 3 ort, og tvo smalebeist, kvart verd 2 ort og 4 skjeling. 

Anders Larsson indre Tuen, f. 1743, bygsla farsbruket i 1772.  G. 1770 Bodil Johannes dtr. Torvik frå Jondal, f. 1742.  Born: Gjertrud, f. 1771, s. n., Marta, f. 1772, g. 1796 Nils Storum, s. S. 3, Johannes, f. 1774, d. 1795, Brita, f. 1776, g. 1806 Nils Hovland, s. H. 1, Peder, f. 1779, sjømann, g. II 1811 Serina Jørgens dtr., b. Bergen, Lars, f. 1782, ug., Torkjell, f. 1786, g. b. Bergen.  Ein gut døydde tidleg.  Anders dreiv mykje med fiske, men hadde svert vandt for å greida seg, og skuldi hans var mykje større enn verdet av det han åtte.  Han kom saman med grannane på Tuen og Lekvenmennene i strid med ytre Moberg um beitehagen, s. ytre Tuen og ytre Moberg.  I 1792 hadde han eit basketak med Peder Skjeie på kyrkjevegen og brukte då so sterke ord attåt, at han måtte på tinget og ta ordi sine attende.  Då kona døydde i 1796 let han bruket frå seg, men livde til 1819. 

Jon Nilsson ytre Lekven, f. 1772, vart i 1796 gift med Gjertrud Anders dtr. indre Tuen, f. 1771, og fekk same året bygsla bruket etter verfaren.  Gjertrud døydde i 1836, og Jon gifte seg att tvo år etter med Brita Anders dtr. Særvoll, f. 1792.  Born: Nils, f. 1799, s. n., Jakob, f. 1801, s. br. 4, Boel, f. 1804, g. 1850 Amund Hildershavn, s. Askvik 5, Anna, f. 1806, d. 1824, Lars, f. 1809, g. 1838 Margreta Storum, s. S. 3, Daniel, f. 1813, d. ug. 1867.  Jon dreiv fiske likeins som fyremannen.  I 1813 kom han upp i ein leid floke med di han uviljande hadde kjøpt nokre stolne ting av ei kvinna frå Bergen, s. O. B. II 155.  Jon døydde i 1850, og ekkja gifte seg att i 1854 med Peder ytre Lekven, s. y. L. 5. 

Nils Jonson indre Tuen, f. 1799, bygsla farsbruket i 1829.  G. I 1827 Brita Bårds dtr. Midthus, f. 1799, d. 1836, g. II 1837 Synneva Haldors dtr. Boga frå Fusa, f. 1808.  Born: Anna, f. 1828, g. 1861 Paul Hansson Austestad frå Fusa, i Amerika, Haldor, f. 1837, s. n., Brita, f. 1840, d. ung, Jon, f. 1845, g. 1866 Engel Hans dtr. Osøyri, s. Kalvetræ 1, Engjel, f. 1848, g. 1876 Ingeborg Nils dtr. Bø, i Amerika, Nils, f. 1852, d. ug. 1896.  Nils dreiv med sjøen likeins som faren.  Han døydde alt i 1856. 
Ekkja Synneva Haldors dtr. hadde so bruket nokre år.  Ho døydde i 1891. 

Haldor Nilsson indre Tuen, f. 1837, bygsla bruket etter mori i 1864.  G. I 1865 Kristi Jons dtr. Bø, f. p. Tysse ikr. 1838, d. 1886, g. II 1902 Mari Anders dtr. ytre Tuen, f. 1853.  Born: Nils, f. 1860, s. n., Bertin, f. 1867, g. 1893 Kari Døsen, s. Kuven 13, Synneva, f. 1871, d. ug. 1904, Jon, f. 1873, d. ung, Jonas, f. 1877, s. br. 5.  Haldor dreiv treskoarbeid attåt gardsbruket.  Han døydde i 1927 og Mari i 1926. 

Nils Haldorson indre Tuen, f. 1860, kjøpte farsbruket (innmarki) av Staten i 1900 for 1950 kroner.  Han hadde fyrr pakta eit bruk på Skjeie, s. S. 1.  G. I 1895 Larsina Jons dtr. indre Tuen, f. 1867, d. 1902, g. II 1904 Synneva Hans dtr. Haga frå Fusa, f. 1861.  Born: Hilda, f. 1899, Laurits, f. 1901, s. n.  Tvo born døydde unge.  Nils var steinarbeidar o. a.  Han døydde i 1927 og Synneva i 1926. 

Laurits Nilsson indre Tuen, f. 1901, skøytte bruket etter faren i 1928 og hev det no.  Systeri Hilda hev stelt heime hjå han. 


INDRE TUEN 3 

Rasmus indre Tuen vart brukar her ikr. 1650.  Me finn han nemnd fyrste gong i 1654, då han fekk ein «seks manns dom» på seg.  Han retta seg ikkje etter domen og måtte difor atter for retten.  Korlenge han då hadde vore busett på Tuen veit me ikkje, og me veit heller ikkje kvar han kom frå.  Det er mykje truleg at han fyrr hadde vore busett i Samnanger, for i 1655 vart han og fleire bønder i Samnanger stemnde til tings av kjøpmann Isak Davidsen i Bergen for vara som dei hadde borga hjå han.  Rasmus vart rekna som husmann og hadde truleg berre ein liten part av garden.  Kva tid han døydde, veit me ikkje, men han var livande i 1676 då han ein sundag det året stod fadder i Oskyrkja. 

Peder Nilsson, f. ikr. 1647, vart brukar etter Rasmus.  Kvar han var frå, veit me ikkje visst, men fleire ting tyder på at han var son åt Nils indre Moberg og bror åt Vinsjans Tuen på br. 2.  Andre ting tyder likevel på at Peder var den same som ei tid var buande på Storum, s. S. 1, og sidan vart buande i Særvollsviki, og etter det skulde han vera son åt Nils Særvoll.  Peder var berre nokre få år på Tuen, og det er ikkje utruleg at han flutte til Storum i 1680 åri. 

Vinsjans indre Tuen som hadde bruk 2 stjorna ogso dette bruket til han døydde i 1698. 

Lars Jørgenson Skjeie, f. 1677, bygsla bruket etter Vinsjans.  G. 1703 Dordi Ols dtr. Gjemdal, f. 1676.  Born: Jørgen, f. 1703, var gift og busett utanfyre Osbygdi, Kari, f. 1707, g. 1738 Johannes Nordstrønen, s. N. 3, Lars (tvilling), f. 1708, s. n.  Ein gut døydde ung.  Lars dreiv fiske og sat tolleg godt i det.  Han og kona døydde begge i 1744. 

Lars Larsson indre Tuen, f. 1708, bygsla bruket i 1734.  Faren heldt att ein liten part av bruket og vart rekna som plassmann etter at han let bruket frå seg.  Då faren døydde, fekk Lars ogso denne parten.  G. I 1737 Mari Bårds dtr. Sørstrønen, f. 1713, d. 1762, g. II 1763 Brita Sjurs dtr., f. ikr. 1730, som tente på Lysekloster men som ikkje var frå Os.  Hans Larsson Eide var elles farbror hennar.  Av 8 born vaks berre 3 upp: Lars, f. 1744, g. 1770 Agata Særvoll, s. S. 2, Mari, f. 1764, ug., Dordi, f. 1772, s. n.  Lars dreiv mykje med fiske og hadde meire sjøreidskaper enn me finn hjå nokon annan osing i dei tider.  Han sat godt i det og var ein av dei likaste bønder i bygdi.  Då Lars døydde, skulda Formann på Lysekloster pengar til han, medan det vanlege var at leiglendingane i Os stod i stor skuld til Formann. 

Lars var ein fredsam mann som kom godt av det med grannane.  Han hadde bruket radt til han døydde i 1774. 
I Lars si tid var desse husi på bruket: Ei røykstova med timbra kove og ei sval attåt, ei sengebud med sval attåt og sauehus under budi, ei løda med innbygt fjos og sval utanfyre, eldhus, vedskytja og kvernhus.  Alle husi var i framifrå stand, og då godseigar Formann heldt husettersyn på Tuen i 1750 fann han ikkje ein einaste ting her å peika på.  Det hende ikkje på noko anna bruk i Osbygdi.  – I skiftet millom Tuen og Moberg hadde Lars sett upp eit skiftegjerde, men som me ser under ytre Tuen og ytre Moberg var det lite gagn i gjerdet. 
Ekkja Brita Sjurs dtr. hadde bruket eit par år etter at mannen døydde. 

Amund Bårdson Mobergslien, f. 1749, gifte seg med ekkja Brita Sjurs dtr. i 1776 og vart brukar her.  Brita døydde i 1806, og Amund, som var kårmann sidan 1798, gifte seg att i 1812 med ekkja Agata Jons dtr. ytre Lekven, s. y. L. 2.  Han flutte då til Lekven der han døydde i 1829. 

Ola Johannesson indre Lekven, f. 1770, vart i 1794 gift med Dordi Lars dtr. indre Tuen, f. 1772, og hadde alt året fyrr fenge bygsel på bruket etter vermori og siste mannen hennar.  Amund stjorna elles bruket saman med Ola dei fyrste 4 – 5 åri.  Ola og Dordi fekk 12 born, men 6 av dei døydde i koppeåri 1803 – 1809.  Dei som vaks upp var: Brita, f. 1795, g. 1815 Johannes indre Lekven, s. i L. 3, Lars, f. 1799, s. n., Johannes, f. 1802, g. 1825 Brita Bjørnen, s. B. 1, Gjertrud, f. 1807, g. 1832 Nils Skjeie, s. S. 1, Kari, f. 1810, g. 1833 Jon Mobergslien, s. M. 1, Anna f. 1813, g. 1844 Ola Mobergslien, s. M. 2.  Ola dreiv fiske likeins som fyremennene.  Han var ein vyrd mann i bygdi og var mykje nytta som lagrettemann og skynsmann.  M. a. var han uppnemnd som skynsmann ved verdsetjing av Skjeiesagi i 1816.  Ola døydde i 1850 og Dordi i 1842. 

Lars Olson indre Tuen, f. 1799, bygsla farsbruket i 1826.  G. I 1825 Ingjerd Anders dtr. Storum, f. 1797, d. 1826, g. II 1827 Synneva Jons dtr. Søratrønen, f. 1806.  Born: Ingjerd, f. 1829, g. 1861 Engjel Øvredal, s. Midtsæter 3, Dordi, f. 1830. d. ug. 1919, Jon, f. 1833, s. n., Ola, f. 1836, g. 1865 Kristi Torbjørns dtr. ytre Tuen, Lars, f. 1838, g. 1869 Brita Kuven, s. K. 8, Anna f. 1841, g. 1864 Ola Mobergslien, s. M. 1, Synneva, f. 1844, g. 1872 Johannes indre Lekven, s. i. L. 3, Johannes, f. 1847, d. ung, Brita, f. 1848, g. 1883 Eivind Olai Tuen, s. ytre Moberg 9.  Lars dreiv med sjøen likeins som faren.  Han var ein vyrd mann og hadde fleire tillitsyrke i bygdi, og var m. a. med i heradstyret 1842 – 45.  Lars døydde i 1853 og Synneva i 1894. 

Jon Larsson indre Tuen, f. 1833, bygsla bruket etter faren.  G. 1866 Ragnhild Torsteins dtr. indre Lekven, f. 1844.  Born: Larsina, f. 1867, s. br. 2, Torstein, f. 1869, i Amerika, Ola, f. 1871, g. 1897 Hansina ytre Haugland, s. y. H. 2, Lars, f. 1873, s. n., Synneva, f. 1876, i Amerika, g. Anders Olson ytre Haugland, Olina, f. 1880, s. bruk 7, Johannes, f. 1885, i Amerika, Hans, f. 1888, i Amerika.  I 1901 kjøpte Jon bruket av Staten for 2300 kroner, men då det skulde gjevast skøyte året etter let Jon handelen fara, og statsministar Chr. Michelsen kjøpte bruket for den nemnde kjøpesumen.  Jon var sjømann og hadde farty som han reiste med på Nordland o. a. st.  Som kårmann sette han upp eit serskilt hus som dotteri Olina hev no, s. br. 7.  Han døydde i 1922 og kona i 1923. 

Lars Jonson indre Tuen, f. 1873, kjøpte farsbruket av Chr. Michelsen i 1904.  G. 1897 Inga Hans dtr. Særvollsvik, f. 1872.  Born: Jon, f. 1903, s. n., Ragnhild, f. 1907, g. Johan Ivarson Leganger, i Amerika, Gudrun, f. 1909, s. br. 6, Hanna, f. 1911, g. Johannes Eliasson Kaland i Fana, Ingrid, f. 1914, g. 1935 Lars Økland, s. Ø. 1, Maria, f. 1917.  Lars er murar og steinarbeidar. 

Jon Larsson indre Tuen, f. 1903, skøytte bruket etter faren i 1928.  I 1936 skøytte Jon det til systeri Hanna, men fekk det sjølv att i 1937 og hev det no.  Jon er fast tenestemann i Bergens telefonkompani. 


INDRE TUEN 4 (Dalen, Træet). 

Jakob Jonson indre Tuen, f. 1801, bygsla i 1828 eit stykke av farsbruket som heitte Træet.  I dagleg tale vart det jamnast kalla Dalen.  G. 1826 Herborg Ols dtr. ytre Haugland, f. 1794.  Born: Gjertrud, f. 1824, g. 1851 Berge Pederson Spansteig, b. Matland i Fusa, Jon, f. 1826, s. n., Barbru, f. 1829, ug., Ola, f. 1835, d. ug. 1857.  Jakob dreiv med fiske og ymse anna arbeid.  Han døydde i 1878 og kona i 1871. 

Jon Jakobson indre Tuen, f. 1826, bygsla bruket etter faren i 1854.  G. 1852 Brita Peders dtr. Halhjem, f. 1822.  Born: Ragnhild, f. 1852, d. ung, Jakob, f. 1854, g. b. Kaland i Austrheim, Peder, f. 1856, i Amerika, Eivind Olai, f. 1859, g. 1883 Brita indre Tuen, s. ytre Moberg 11, Anders, f. 1862, g. 1882 Anna Lars dtr. Fusa, i Amerika, Lars, f. 1866, i Amerika.  Jon dreiv med treskoarbeid og var ogso fiskar.  På sine gamle dagar var dei busette i Solbakken.  Han døydde der i 1908 og kona i 1910.  Bruket fall då attende til dei andre bruki på indre Tuen som åtte det. 


INDRE TUEN 5 (Løvli). 

Jonas Haldorson indre Tuen, f. 1877, kjøpte ein part av broren sitt bruk i 1920 og busette seg her.  G. 1913 Malena Engjels dtr. Havsgård frå Fusa, f. 1877.  Jonas er murar og steinarbeidar. 


INDRE TUEN 6 (Solberg). 

Anders Nilsson indre Lekven, f. 1898, kjøpte i 1928 eit stykke av verfaren sitt bruk, der han bygde og busette seg.  Bruket vart skøytt på eldste sonen.  G. 1927 Gudrun Lars dtr. indre Tuen, f. 1909.  Born: Nils, f. 1927, Lars, f. 1929, Asbjørn, f. 1932.  Anders er steinarbeidar. 

INDRE TUEN 7 (Vesletun) 

Olina Jons dtr. indre Tuen, f. 1880, fekk i 1939 skilt ut eit lite stykke av farsbruket.  Ho åtte fyrr kårstova som faren hadde, s. br. 3.  Olina hev vore tenestemann i Frelsesarmeen.